Wata Kotu ta bayar da Belin Nasir Yalwa a Abuja
Daga Idris Umar,Zariya
A ranar Talata, 10 ga watan Satumba, 2025, ‘yan sanda sun kama wani dan jarida mai suna Nasir Hassan Yelwa a Abuja. Yana cikin aiki ne, yana daukar rahoto a wajen wani taron Maulidi da Musulmai suka shirya don tunawa da haihuwar Annabi Muhammad (SAW).
An gayyace shi ne don ya zo ya dauki rahoto, amma sai aka kama shi da misalin karfe biyu na rana a unguwar Apo. Daga nan sai suka kai shi wata cibiyar tsare mutane da ake kira Abattoir, wanda a da SARS ke amfani da ita kafin a rushe su.
Babu wani laifi da aka bayyana masa lokacin da aka kama shi. Haka ma jami’an NUJ da ‘yan sanda ba su fadi komai ba kan dalilin kama shi.
Wannan abu ya tada hankalin mutane da dama, musamman kungiyoyin da ke kare ‘yancin ‘yan jarida. Kungiyar African Journalists Against Genocide (AJAG) ta fitar da wata sanarwa tana sukar yadda aka kama shi, tana cewa wannan abu cin zarafi ne da kuma barazana ga ‘yancin fadar albarkacin baki.
Sun ce:
"Nasiru yana aikinsa ne na jarida, ba wani laifi ya yi ba. Kama dan jarida ba tare da wani bayani ba, babban kuskure ne. Saukin Jarida ba laifi ba ce.”
Yanzu kotu ta bada belinsa, kuma hakan ya sa mutane da dama suka yi murna. Shugaban NUJ, Alhassan Yahaya, da wasu abokan aikinsa kamar Danjuma Abdullahi da Comrade Yahaya M. Abdullahi sun halarci kotun, kuma suka raka shi bayan zaman kotun ya kare.
Shari’ar zata ci gaba a kotu nan gaba kadan, inda lauyoyin sa za su nemi kotu ta bayyana masu dalilin kama shi ba bisa ka’ida ba.
0 Comments